Rask 2027 – Ráðstefnukall
Íslenska málfræðifélagið boðar til hinnar árlegu Rask-ráðstefnu laugardaginn 30. janúar 2027. Auglýst er eftir fyrirlestrum um íslenskt mál og almenna málfræði.
Einnig er auglýst eftir örfyrirlestrum (flugum) og eru nemendur og ungir og upprennandi málfræðingar sérstaklega hvattir til að senda inn útdrætti fyrir þann dagskrárlið. Flugurnar mega fjalla um hvaða málfræðilega efni sem er en í ár köllum við sérstaklega eftir erindum með þemanu skúffumálfræði.*
Hefðbundnir fyrirlestrar
Hver fyrirlesari fær til ráðstöfunar 30 mínútur og er eðlilegt að ætla 5–10 mínútur af þeim til umræðna og fyrirspurna úr sal. Berist margar tillögur um erindi áskilur stjórn félagsins sér rétt til að velja úr tillögum og/eða stytta þann tíma sem hverjum fyrirlesara er ætlaður. Þau sem vilja halda fyrirlestur eru beðin að senda vinnutitil og útdrátt um efnið (400–500 orð) til Ingunnar Hreinberg Indriðadóttur (ingunn@hi.is) eigi síðar en 23. nóvember 2026 og skal tölvuskeytið merkt „Rask 2027“.
Flugur
Hver fyrirlesari fær til ráðstöfunar 7 mínútur. Berist margar tillögur um erindi áskilur stjórn félagsins sér rétt til að velja úr tillögum og/eða stytta þann tíma sem hverjum fyrirlesara er ætlaður. Þau sem vilja halda fyrirlestur eru beðin að senda vinnutitil og útdrátt um efnið (200–300 orð) til Ingunnar Hreinberg Indriðadóttur (ingunn@hi.is) eigi síðar en 23. nóvember 2026 og skal tölvuskeytið merkt „Rask-flugur 2027“.
*Skúffumálfræði getur til dæmis átt við um sérkennileg tilbrigði sem þú heyrðir úti í búð og kannt ekki að útskýra eða rannsóknarefni sem þú veist ekki alveg hvað þú átt að gera við og þess vegna liggur það ofan í skúffu.
Birt 19. október 2026
Eldri fréttir
Íslenska málfræðifélagið boðar til aðalfundar miðvikudaginn 2. september klukkan 15-17. Á dagskrá verður meðal annars skýrsla stjórnar, ársreikningur og stjórnarkjör. Öllum félögum er boðið á fundinn í Málstofunni í Eddu, Arngrímsgötu 5.
Birt 26. ágúst 2026
Félagsfólki sem er á póstlista félagsins berst vikulegur póstur varðandi málvísindakaffi og annað tilfallandi. Ef þú eða einhver í kringum þig ætti að vera á póstlista félagsins en er það ekki má viðkomandi gjarnan hafa samband í gegnum netfangið srf@hi.is og viðkomandi verður þá bætt við póstlistann. Vinsamlegast látið orðið berast.
Birt 29. október 2025
Málvísindakaffi hefur hafið göngu sína á ný og verður haldið vikulega á skólaárinu 2025-2026 líkt og verið hefur. Tilkynningar með lýsingum á erindum eru sendar á póstlista félagsins, birtar í hóp félagsins á Facebook og einnig hér á síðunni.
Birt 10. september 2025
38. Rask-ráðstefnan
38. Rask-ráðstefna Íslenska málfræðifélagsins verður haldin í samvinnu við Málvísindastofnun Háskóla Íslands dagana 24.-25. janúar á Heimasvæði tungumálanna í Veröld – húsi Vigdísar. Ráðstefnan verður lengri og með hátíðlegra yfirbragði en venjulega í tilefni 45 ára afmælis Íslenska málfræðifélagsins, 50 ára afmælis Málvísindastofnunar og 25 ára afmælis Málvísindakaffis. Að ráðstefnunni lokinni verður boðið upp á léttar veitingar og skálað.
37. Rask-ráðstefnan
37. Rask-ráðstefna Íslenska málfræðifélagsins í samvinnu við Málvísindastofnun Háskóla Íslands verður haldin í fyrirlestrasal Eddu — Húsi íslenskunnar laugardaginn 27. janúar 2024.
Fyrri Rask-ráðstefnur (fellivalmynd)